Vetura e fundit Ferrari Formula 1 e Michael Schumacher do të dalë në ankand nga Sotheby’s në New York më 14-19 nëntor dhe mund të arrijë më shumë se 22.5 milionë dollarë – çmimi më i lartë i paguar për një veturë F1 të Schumacher deri më sot.

Ferrari 248 i vitit 2006 është një nga tetë të ndërtuar për sezonin e fundit të pilotit gjerman me ekipin italian dhe është një nga vetëm katër Ferrari të epokës së Schumacher që ka shënuar pesë ose më shumë fitore, përcjell Telegrafi.

Ishte gjithashtu vetura aktuale në të cilën Schumacher theu rekordin e të gjitha kohërave të Ayrton Senna-s për pozicionet pole F1.

Siç raportohet, vetura do të ekspozohet në Sotheby’s New York nga 8-20 nëntor.

Ofertimi hapet më 14 nëntor dhe mbyllet në orën 17:00 më 19 nëntor. /Telegrafi/